Exo 8 | NdeIBE | STEP | UJehova wathi kuMosi, “Buyela njalo kuFaro uthi kuye, ‘UJehova uthi, “Vumela abantu bami bahambe bayengikonza.

Exodus 8

1 UJehova wathi kuMosi, “Buyela njalo kuFaro uthi kuye, ‘UJehova uthi, “Vumela abantu bami bahambe bayengikonza. 2 Ungala ngizathumela uhlupho lwamaxoxo elizweni lakho. 3 Umfula uNayili uzagcwala amaxoxo. Azangena esigodlweni sakho lasendlini yakho yokulala, lasembhedeni wakho; angene lezindlini zezikhulu zakho lezabantu bakho. Azagcwala ezindaweni zenu zokuphekela, lasemiganwini yenu yokuvubela izinkwa.

4 Amaxoxo la azakuba phezu kwakho laphezu kwabantu bakho kanye lezikhulu zakho.’ ”

5 UJehova wasesithi kuMosi, “Tshela u-Aroni akhombele intonga emifuleni, lasezifudlaneni lasezizibeni zonke zaseGibhithe ukuze kube lamaxoxo ezindaweni zonke zelizwe.” 6 U-Aroni welulela isandla sakhe emanzini eGibhithe, amaxoxo agcwala ilizwe lonke. 7 Kodwa-ke izanuse lazo zenzanjalo ngemilingo yazo yensitha – zenza kwaba lamaxoxo elizweni lonke leGibhithe.

8 UFaro wabiza uMosi lo-Aroni wathi kubo, “Ncengani uNkulunkulu asuse amaxoxo kimi lebantwini bami, lami ngizavumela abantu bakhe ukuba bahambe bayenikela imihlatshelo kuJehova.” 9 UMosi wathi, kuFaro “Ngikutshiya kuwe ukuba ubeke isikhathi sokuthi ngikukhulekele wena lezikhulu zakho labantu bakho ukuze lina lezindlu zenu lilanyulelwe kula amaxoxo, ngaphandle kwalawo azasala kuNayili.” 10 UFaro wathi, “Kwenze kusasa.” UMosi wasesithi, “Kuzakuba njengokutsho kwakho ukuze ukwazi ukuthi kakho omunye onjengoJehova uNkulunkulu wethu. 11 Amaxoxo azasuka kini lezindlini zenu lezezikhulu labantu benu abesesala emfuleni uNayili kuphela.”

12 UMosi lo-Aroni basuka kuFaro. UMosi wakhalaza kuNkulunkulu ukuba asuse amaxoxo ayewathumele kuFaro.

13 UJehova wenza lokho uMosi ayekucelile. Amaxoxo afa ezindlini lemagumeni lemasimini.

14 Bawabuthelela aba zinqwabanqwaba; ilizwe lonke lanuka phu ngamaxoxo.

15 Kodwa uFaro ebona ukuthi udubo seluphungukile womisa inhliziyo yakhe wala ukulalela uMosi lo-Aroni njengokwakuvele kwatshiwo nguJehova.

Uhlupho lwezintwala

16 UJehova wasesithi kuMosi, “Tshela u-Aroni uthi, ‘Phakamisa intonga yakho utshaye uthuli lomhlabathi, uthuli luzaphenduka lube yizintwala elizweni lonke laseGibhithe.’ ”

17 Benza njengokulaywa kwabo, kwathi u-Aroni eselule isandla sakhe ephethe intonga watshaya uthuli, izintwala zahlasela abantu lezifuyo zabo.

18 Izanuse lazo zazama ukwenza izintwala ngemilingo yazo, kodwa zehluleka. Izintwala zazisebantwini lezinyamazaneni. 19 Izanuse zathi kuFaro, “Lokhu kungumunwe kaNkulunkulu.” Kodwa inhliziyo kaFaro yayilukhuni, eyisiqholo. Kabalalelanga njengoba uJehova wayevele etshilo.

Uhlupho lwempukane

20 UJehova wasesithi kuMosi, “Kusasa ubovuka ekuseni kakhulu uhlangabeze uFaro lapho esiya emanzini. Ubokuthi kuye, ‘Vumela abantu bami bahambe bayengikhonza.

21 Ungala, ngizathumela umtshitshi wempukane kuwe, ebantwini bakho lezindlini zenu. Izindlu zabantu baseGibhithe zizagcwala impukane lomhlabathi ugcwale zona.

22 “ ‘Kodwa ngalolosuku akuyikuba njalo eGosheni lapho okuhlala khona abantu bami. Akuyikuba lemitshitshi yempukane khona. Ngakho uzakwazi ukuthi mina nginguJehova uNkulunkulu womhlaba wonke. 23 Ngizakwenza kube lomahluko phakathi kwabantu bami labantu bakho. Lesisibonakaliso esiyisimanga sizakwenzakala kusasa.’ ”

24 UJehova wenza njengoba wayetshilo. Impukane ezinengi okwesabeka kakhulukazi zagcwala esigodlweni sikaFaro lasezindlini zezikhulu zakhe, lakulo lonke ilizwe laseGibhithe; zalitshabalalisa.

25 UFaro wabiza uMosi lo-Aroni. Wathi kubo, “Hambani liyehlabela uNkulunkulu wenu likhonapha kulelilizwe.”

26 UMosi waphendula wathi, “Lokho akulunganga. Imihlatshelo yethu esinikela ngayo kuNkulunkulu wethu ayamukeleki ebantwini beGibhithe. Singanikela ngeminikelo abayizondayo kambe kabayikusitshaya ngamatshe na?

27 Kumele sithathe uhambo lwezizinsuku ezintathu siye enkangala siyemhlabela khonale uJehova uNkulunkulu wethu njengokusilaya kwakhe.” 28 UFaro wathi, “Ngizalivumela lihambe liyenikela imihlatshelo kuJehova uNkulunkulu wenu enkangala, kodwa lingayi khatshana. Khathesi ngikhulekelani.”

29 UMosi waphendula wathi, “Ngizakuthi ngisanda kusuka ngikhuleke kuJehova, njalo kusasa impukane zizasuka kuFaro, kuzikhulu zakhe lebantwini bakhe. Nanzelelani ukuthi uFaro kalikhohlisi futhi ngokungavumeli abantu ukuba bahambe bayenikela imihlatshelo kuJehova.”

30 Emva kwalokho uMosi wasuka kuFaro wasekhuleka kuJehova. 31 UJehova wenza lokho okwakucelwe nguMosi: zonke impukane zanyamalala kuFaro lezikhulu zakhe labantu bakhe, akwaze kwasala leyodwa. 32 Kodwa langalesosikhathi uFaro wenza inhliziyo yakhe yaba lukhuni kazabavumela abako-Israyeli ukuba bahambe.